III Concurso de postal de Nadal científica

O EDLG e a Biblioteca convocan o III Concurso de postal de Nadal científica. Tes ata o 12 de decembro para participar. Anímate, que hai premio! Consulta as bases aquí.

Celebración do Samaín

O pasado xoves 30 de outubro celebramos o Samaín no noso IES. Antes do recreo, a marcha da Santa Compaña, capitaneada pola nosa encargada de Biblioteca, Begoña, desfilou polo corredor e polas aulas, acompañada dunha melodía terrorífica a cargo de alumnado de 3º da ESO, que tocou xunto coa súa profe de Música, Teresa. 

Ademais, tamén alumnado de 3º da ESO fixo un túnel do terror no que había que ser moi valente para atreverse a entrar. Pero isto non foi todo, senón que durante a celebración repartíronse os premios do concurso de microrrelatos de Samaín e puidemos desfrutar dun rico chocolate. 

Os titores e titoras tamén fixeron un labor mrabilloso para ambientar o instituto e decoraron portas e taboleiros das aulas co seu alumnado. Por último, os estudantes de Anatomía aplicada de 1º de Bacharelato fixeron uns magníficos traballos sobre enfermidades terroríficas, relacionándoas con diversas personaxes do Samaín.

Deixámosvos un resumo da nosa celebración na presentación!

II Concurso de microrrelatos de Samaín

Desde o EDLG e a Biblioteca do IES Fernando Esquío, un ano máis, propoñémosvos un concurso de microrrelatos para o Samaín. Podedes consultar as bases aquí, así coma nos carteis que hai colocados polo centro. Animádevos a participar e sede creativos! Hai premio para o mellor microrrelato de cada categoría!

Premios I Concurso de poesía

Imos cun pouco de retraso neste final de curso no que o tempo non nos chega, pero por fin publicamos as fotos da entrega de premios do I Concurso de poesía.

As gañadoras do concurso foron:

• Noelia Casal Otero, de 2º A ESO, na categoría de haikus.
• Aldara Pérez Serantes, de 1º B da ESO, na categoría de poesía escura.

Ademais, tivemos os seguintes accésits, todos eles na categoría de haikus:

• Isabela Abeledo França, de 1º A ESO
• David Abeledo Feal, de 2º A ESO
• Simón García Sisto, de 2º A ESO
• Laura Tojeiro Fraga, de 2º B ESO

Moitas grazas a todos/as os/as participantes!

Dai Minh, un dos gañadores do XXV certame de poesía e imaxe En galego, sen filtro

Hoxe coñecimos que Dai Minh González Soto, alumno de 1º B da ESO no noso IES, é un dos gañadores do certame de poesía e imaxe En galego, sen filtro, organizado pola Coordenadora de Equipas de Normalización Lingüística de Ferrolterra e o Concello de Ferrol.

A súa obra, xunto coa do resto de gañadores e gañadoras, será exposta en Ferrol, e haberá un acto para a entrega de premios. Informarémosvos tan pronto como coñezamos as datas dos eventos. 

Moitos parabéns a Dai Minh!!

I Concurso de poesía

O próximo 21 de marzo celébrase o Día Mundial da Poesía, que conmemora unha das formas máis preciadas da expresión, identidade e lingüística da humanidade. Nós queremos contribuír a conmemorar este día e, por iso, desde o EDLG e a Biblioteca, lanzamos o I Concurso de poesía, no que podedes participar a través de dúas categorías:

• Categoría A: creación de haikus
• Categoría B: poesía escura

Consultade aquí as bases.

Animádevos a participar, que hai premio!

XXV certame de poesía e imaxe. En galego, sen filtro

Este curso participamos no XXV certame de poesía e imaxe En galego, sen filtro, organizado pola Coordenadora de Equipas de Normalización Lingüística de Ferrolterra e o Concello de Ferrol. A obra que presentamos desde o noso centro é a que vos deixamos na imaxe, realizada por Dai Minh González Soto, de 1º B da ESO. 

Desexámoslle moita sorte a Minh e damos as grazas a todos/as aqueles alumnos/as que presentastes as vosas obras para este certame! 

Premios do I Concurso de memes polo Día de Castelao

Este venres fixemos a entrega de premios aos/ás alumnos/as gañadores/as do I Concurso de memes polo Día de Castelao. Aos membros do xurado costounos bastante decidir, xa que tiñamos moitos traballos de gran enxeño e creatividade.

Moitos parabéns a Marta, Nerea, Kevin, Santi e Christian! E, por suposto, moitas grazas a todos/as os/as participantes!

Concurso de memes Día de Castelao

Para conmemorar o Día de Castelao, que se celebra o 30 de xaneiro, propoñémosvos un concurso de memes relacionado coa súa obra Cousas da vida. Só tedes que elixir un debuxo dos que aparecen nesa obra e empregalo para facer un meme sobre o que vós queirades. Hai exemplares do libro na nosa biblioteca e tamén podedes atopalos neste enderezo web. Animádevos a participar! Haberá premio para os mellores memes!

Postais científicas de Nadal

Xa temos expostas no recuncho de Nadal as postais científicas que se presentaron ao concurso. Este venres coñeceremos o/a gañador/a de cada categoría. Estade antentos/as!

IV concurso de vídeos "Youtubers científcos"

A USC convoca a cuarta edición do concurso de vídeo Youtubers científicos, unha iniciativa que forma parte do plan anual de actividades "Ciencia de ida e volta", que conta coa colaboración da Fundación Española para a Ciencia e a Tecnoloxía-Ministerio de Ciencia, Innovación e Universidades.

Como novidade, este ano pode participar alumnado da ESO e do Bacharelato, con vídeos dun minuto de duración que respondan a seguinte cuestión: Por que a ciencia é relevante para a sociedade?

Anímate a participar! O prazo de inscrición estará aberto do 23 de decembro de 2024 ao 13 de xaneiro de 2025. Tes aquí toda a información.

II Concurso de postal de Nadal científica

O EDLG e a Biblioteca convocan o II Concurso de postal de Nadal científica. Tes ata o 13 de decembro para participar. Anímate, que hai premio! Consulta as bases aquí.

Concurso microrrelatos Samaín 2024

Desde o EDLG e a Biblioteca do IES Fernando Esquío propoñémosvos un concurso de microrrelatos para o Samaín de 2024. Podedes consultar as bases aquí, así coma nos carteis que haberá colocados polo centro. Animádevos a participar! Hai premio para o mellor microrrelato de cada categoría!