O venres 20 de decembro conmemórase o 117 aniversario do himno galego. Tal día coma mañá, do ano 1907, no Gran Teatro da Habana, interpretábase por primeira vez, solemnemente e institucionalmente, o noso himno. As plataformas Vía Galega e Galiza Cultura, coorganizan este venres 20 de decembro, ás 19:30 horas, na rúa Rego de Auga da Coruña, xunto co grupo de gaitas Cantigas da Terra, un acto para que todas as persoas que se acheguen ao lugar canten xuntas o himno. Haberá tamén unha breve intervención do profesor da Universidade da Coruña Manuel Ferreiro, máximo especialista do noso himno e da obra de Eduardo Pondal.
