O Día da Ilustración homenaxea a Siro

No 2026, o Día da Ilustración, que se celebra o 30 de xaneiro, renderá homenaxe ao artista gráfico Siro López, nado en Ferrol en 1943, e que destaca polo seu traballo de caricaturista político e humorista gráfico, ademais doutras facetas como retratista, debuxante e pintor. É a segunda vez que para conmemorar esta efeméride se escolle a unha persoa en vida.

Hoxe recordamos a Carvalho Calero

Tal día coma hoxe de 1990 finaba en Santiago de Compostela Ricardo Carvalho Calero. Ferrolán de nacemento, foi historiador da literatura, crítico literario, filólogo, lingüista, escritor e primeiro catedrático de Lingua e Literatura Galegas da Universidade de Santiago de Compostela. Numerario da Real Academia Galega e membro de honra da Assosiaçom Galega da Língua. Considerado o ideólogo do reintegracionismo lingüístico, desde 1981 asinou como Ricardo Carvalho Calero.

Calendario do Libro e da Lectura 2025

Presentámosvos o Calendario do Libro e da Lectura para 2025,  que dá conta de 34 efemérides no ámbito das letras para os vindeiros doce meses, recolle datas de homenaxe a Castelao con motivo do 75 aniversario do seu falecemento e a Isaac Díaz Pardo, a quen se lle dedica o vindeiro Día das Artes Galegas.

Canda a estas datas, o calendario recolle como novidade a celebración o 17 de outubro do Día do patrimonio inmaterial, que contará con actividades específicas nas bibliotecas públicas do país. Tamén se incorporan a esta programación, o 27 do mesmo mes, o Día da corrección de textos, e o 22 de novembro, o Día da música.

As ilustracións do calendario foron feitas por Carlos Gallego Domínguez.

O ceo de Rosalía

O 17 de decembro de 2019, a Unión Astronómica Internacional designou oficialmente co nome Rosalíadecastro a unha estrela na constelación do Serpentario. No quinto aniversario deste fito histórico, o mércores 18 de decembro celébrase unha actividade na Casa das Ciencias da Coruña na que Martin Pawley, promotor da campaña desde a Agrupación Astronómica Coruñesa Ío, contará historias da astronomía a través dos textos de Rosalía de Castro, nunha sesión especial de planetario ao redor da escritora e a súa estrela.

A actividade é de entrada libre ata completar a capacidade da sala. As entradas empezarán a repartirse a partir dás 19:15 na recepción da Casa das Ciencias. Non se permite a entrada unha vez iniciada a actividade. 

Tal día coma hoxe do ano 1834, Domingo Fontán entrega a Carta Xeométrica de Galicia

Hoxe cúmprense 190 anos de que Domingo Fontán entregou a Carta Xeométrica de Galicia, o primeiro mapa feito en España a través de métodos científicos e medicións matemáticas. Para a súa realización, Fontán aplicou o mesmo procedemento proxectado por Jorge Juan a mediados do século XVIII para o levantamento do mapa de Espña: a medición dunha base central e unha rede fundamental de triángulos. Pero engadiulle medicións que incrementaron a precisión e o dotaron doutros valores, como a altirude dos principais cumios. Unha das características máis importantes da Carta é a súa escala, de 1: 100 000, que se adiantou aos mapas oficiais doutros países europeos, que posteriormente escollerían a mesma proporción.

Cúmprense 100 anos da expedición fotográfica de Ruth Matilda Anderson en Galicia

Entre 1924 e 1926, a fotógrafa norteamericana Ruth Matilda Anderson viaxou dúas veces a Galicia por encargo da Hispanic Society of America. Durante a súa estancia, realizou máis de 5000 fotografías dunha gran calidade nas que retratou os costumes do pobo galego, en especial, as do mundo rural. Ademais, entrevistouse con moitas figuras relevantes da cultura de Galicia e, xuntando os rexistros escritos coas experiencias cotiás, deu lugar a un libro arredor dos campesiños, a infancia e as mulleres. É por este gran labor que hoxe queremos destacar a figura desta importante muller. 

Tedes aquí unha escolma de fotografías realizadas durante a súa viaxe.