Hoxe coñecimos que Dai Minh González Soto, alumno de 1º B da ESO no noso IES, é un dos gañadores do certame de poesía e imaxe En galego, sen filtro, organizado pola Coordenadora de Equipas de Normalización Lingüística de Ferrolterra e o Concello de Ferrol.
A súa obra, xunto coa do resto de gañadores e gañadoras, será exposta en Ferrol, e haberá un acto para a entrega de premios. Informarémosvos tan pronto como coñezamos as datas dos eventos.
Moitos parabéns a Dai Minh!!
Hoxe celébrase o Día Mundial da Poesía e queremos conmemoralo con estes versos de Rosalía de Castro, recollidos na súa obra Cantares gallegos, un poemario que bebe directamente da poesía popular. É precisamente por esta razón, que no ano no que se dedica o Día das Letras Galegas ás cantareiras e á poesía popular oral, eliximos este poema. Esperamos que vos guste!
Este curso, o noso IES presenta un grupo musical de alumnado ao festival A mocidade coa lingua, que se celebrará o 11 de abril no Auditorio de Ferrol. Desde aquí, desexámoslle moita sorte aos Esquíos Roqueiros!
Este curso participamos no XXV certame de poesía e imaxe En galego, sen filtro, organizado pola Coordenadora de Equipas de Normalización Lingüística de Ferrolterra e o Concello de Ferrol. A obra que presentamos desde o noso centro é a que vos deixamos na imaxe, realizada por Dai Minh González Soto, de 1º B da ESO.
Desexámoslle moita sorte a Minh e damos as grazas a todos/as aqueles alumnos/as que presentastes as vosas obras para este certame!
O 21 de febreiro conmemórase o Día Internacional da Lingua Materna, proclamado pola UNESCO hai 25 anos. Este día lembra a importancia de preservar as linguas para salvagardar o patrimonio cultural, mellorar a educación e fomentar sociedades máis pacíficas.
Hoxe queremos reivindicar a nosa lingua, o galego. Queremos defender o seu uso e recordar a importancia que temos cada un de nós no logro de que perdure no tempo.
Para conmemorar o Día de Rosalía, e utilizando como inspiración o libro O herbario de Rosalía (do que temos exemplares na nosa biblioteca), o alumnado de Bioloxía de 1º de Bacharelato fixo este proxecto no que, a partir dos versos da autora, estudou as características biolóxicas de distintas especies de plantas. Temos a exposición dos carteis no corredor da planta baixa do instituto e tamén volos deixamos aquí. Parabéns ao alumnado polo seu traballo!
Sumámonos á campaña da Fundación xistral "M8 por ler!" e animámosvos a que leades en galego, porque hai moitísimas historias das que gozar na nosa lingua.
Deixámoste aquí a ligazón na que poderás atopar toda a información sobre esta iniciativa.
Neste día de tanta choiva, propoñemos vocabulario relacionado coa máis miúda. Cantas maneiras diferentes coñeces para nomeala?
Desde o ano 2016, o luns máis próximo ao 15 de outubro, aniversario do falecemento de Teresa de Jesús, conmemórase o Día das Escritoras. Desde o EDLG queremos renderlle homenaxe a todas aquelas escritoras que, coas súas creacións, contribúen ou contribuíron á difusión da lingua e a cultura galegas.
A nova enquisa estrutural de fogares do Instituto Galego de Estatística revela que o castelán xá é a lingua predominante en Galicia. É a primaira vez na historia que nunha enquisa destas características o galego ten unha porcentaxe de falantes habituais inferior ao castelán. Un dos datos máis sorprendentes é que no grupo de 5 a 14 anos a porcentaxe de persoas que non saben falar ou que falan moi pouco galego é do 32,44%, o que significa que en cinco anos duplicouse o número de nenos e nenas que non falan galego.
Non contribúas a que isto continúe pasando. Fala galego!
Tras o Día Europeo das Linguas, sumámonos á petición de que se cumpran para o galego as recomendacións do Consello de Europa.
Preme aquí para ler a información completa
Desde o ano 2001, o 26 de setembro conmemórase o Día Europeo das Linguas, que este ano ten o lema Linguas para a paz. O obxectivo desta data é poñer en valor a diversidade lingüística da Unión Europea e promover a aprendizaxe de idiomas en toda Europa en persoas de calquera idade.
Desde o EDLG creamos este Wordle para que xoguedes e adiviñedes a palabra galega agochada. Esperamos que o desfrutedes!
Iniciamos o curso escolar e con el inauguramos este blog do Equipo de Dinamización da Lingua Galega no IES Fernando Esquío. Dámosvos a benvida con este fermoso poema de Manuel María:
