Falece Bernardino Graña aos 92 anos de idade

Esta madrugada faleceu en Nigrán o poeta do mar, Bernardino Graña, aos 92 anos de idade. Nado en Cangas, o escritor, na súa mocidade, foi un dos membros fundadores do grupo Brais Pinto e a súa voz converteuse nunha das máis recoñecidas polo público e a crítica das letras galegas contemporáneas. A paisaxe, a fala, a experiencia amorosa e os ambientes mariñeiros nos que medrou deixaron unha fonda pegada na lírica do autor, que tamén cultivou o teatro e a narrativa.

Que a terra che sexa leve, Bernardino!

Premios Youtubeiras+ 2024

O sábado 1 de febreiro de 2025 terá lugar no Pazo da Cultura de Narón, ás 19 horas, a gala de entrega de premios Youtubeiras+. Estará conducida por Javi Sánchez (Meiga-i) e contará coa actuación musical de De Ninghures. A entrada é de balde. Se che interesa asistir, tes toda a información aquí.

Ademais, previamente á gala, de 17 h a 17.50 h, Nuria Espasandín e Sergio Casal de Toxío, impartirán un obradoiro para crear contidos na Rede a través de consellos prácticos. Así mesmo, darán a coñecer os contidos en galego na Internet e ofrecerán ferramentas e recursos na nosa lingua para resolver todas as  dúbidas lingüísticas que poidades ter.

Por se fose pouco, entre o obradoiro e a gala, haberá un aperitivo na entrada do propio Pazo da Cultura, onde relaxarse antes da entrega de premios, posar diante da cámara, rexoubar sobre quen cres que serán as canles vencedoras e responder ás preguntas de Gabri Fuentes en directo para as redes.

Non perdades esta ocasión!

Se aínda non sabedes que é Youtubeiras+, entrade neste enlace, onde tedes toda a información sobre o proxecto.

Plataformas para ver películas e series en galego

Facémonos eco da información publicada por As Chaves da Lingua e deixámosvos unha listaxe de plataformas nas que podedes ver películas e series en galego:

• A web da TVG, cunha gran oferta de programas, series e películas.
• Pipocas, unha iniciativa promovida pola Mesa pola Normalización Lingüística para recompilar películas e series que están dispoñibles na nosa lingua tanto dobradas como subtituladas.
• Filmin, unha das poucas plataformas comerciais que inclúe contido en galego, tanto dobrado como subtitulado. Nela podedes atopar filmes de autores galegos, clásicos dobrados e documentais.
• Vogal, unha plataforma dixital que promove o cinema galego. Ofrece un catálogo de filmes, documentais e curtametraxes de creación galega, dando visibilidade ao traballo de cineastas e artistas que apostan pola nosa lingua.
• Agalinhas, unha canle de Youtube para os máis pequenos/as.
• A páxina oficial do Xabarín, que permite acceder a unha selección de series e programas que marcaron unha época, dobrados ao galego.
• Dragon Ball en galego, unha páxina que recompila os episodios clásicos da serie, dobrados é nosa lingua.

Agardamos que esta información vos sexa útil e que vos animedes a consumir audiovisual en galego!

Concurso de memes Día de Castelao

Para conmemorar o Día de Castelao, que se celebra o 30 de xaneiro, propoñémosvos un concurso de memes relacionado coa súa obra Cousas da vida. Só tedes que elixir un debuxo dos que aparecen nesa obra e empregalo para facer un meme sobre o que vós queirades. Hai exemplares do libro na nosa biblioteca e tamén podedes atopalos neste enderezo web. Animádevos a participar! Haberá premio para os mellores memes!

Tal día coma hoxe do ano 1913 nacía Fernández del Riego

Tal día coma hoxe do ano 1913, nacía en Vilanova de Lourenzá o intelectual e activista político Francisco Fernández del Riego quen, desde os anos 30, desenvolveu un traballo constante e recoñecido a prol da cultura galega co que continuou ata os seus últimos meses de vida. Isto fixo del unha das personalidades máis destacadas de Galicia. Este autor foi a figura homenaxeada nas Letras Galegas de 2023.

2025: Ano Castelao

Tal día coma hoxe, o 7 de xaneiro de 1950, morría no exilio de Bos Aires Afonso Daniel Rodríguez Castelao, cumpríndose, polo tanto, 75 anos do seu pasamento. Para conmemorar esta data, a RAG quere lembrar a súa figura e o seu legado estreando un novo sitio web no que irá incorporando, ao longo dos vindeiros meses, distintos fondos que custodia relacionados con quen, en palabras do presidente da institución é "sen dúbida a gran figura política e cultural da Galicia contemporánea".

No IES tamén faremos actividades relacionadas en torno a Castelao que vos iremos presentando neste espazo.

Letras galegas 2025

Este ano 2025, as Letras Galegas 2025 estarán dedicadas á poesía popular oral, e a RAG vén de abrir na súa web o espazo do Día das Letras Galegas, no que se recollen vídeos, artigos e fotografías que se irán ampliando ao longo do ano.

No IES tamén teremos as nosas propias actividades de conmemoración, que vos iremos presentando a medida que as vaiamos levando a cabo. 

Aproveitamos para desexarvos un moi feliz ano novo!